Avazjon Abdumajitov Ijodiy ishlar katalogi

Avazjon Abdumajitovning katalogi raqamli san’atning ajoyib olami va imkoniyatlarini namoyish etgan. Rassomning ishlari asosan Krita, Sketchbook va Infinite Painter dasturlarida yaratilgan bo‘lib, tomoshabinga tabiat va atrof olamdagi hodisalarni chuqur mushohada yuritishga chorlaydi, sokin o‘ychanlikdan to yorqin zavqqacha bo‘lgan assotsiatsiyalardan iborat chuqur his-tuyg‘ularni taqdim etadi. Katalogga taqdim etilgan mavzular asosan manzara janrida bo‘lib, ularning har birida rassomning hayot yo‘lida anglagan haqiqatlari landshaft kompozisyalar orqali ochib berilgan. Bunda A.Abdumajitov tabiat va inson kechinmalarini mahorat bilan uyg‘unlashtiradi, ranglarning ifodaviy ta’sirchanligidan samarali foydalanadi. Qish va yoz fasllariga bag‘ishlangan ta’sirli manzaralar, «Hayot yo‘llari», «Qalbga berilgan ozorlar», «Uyga qaytish» va «Oshiq» kabi mavzuli kompozitsiyalarda rassom shaxsiy kechinmalarini rang va shakl orqali ifoda etishga uringan. «Orol fojeasi» turkum ishlarida rassom muhim ekologik muammoni ko‘taradi. Ularda fojeaviy yo‘qotish va umidsizlik tuyg‘ulari yorqin, ifodali chizgilar va qarama qarshi ranglar orqali nafaqat vizual, balki hissiy dissonans yaratgan. Fotokollaj uyg‘unligidagi tashlandiq kemalar, Orol fojeasining salbiy oqibatlari ta’sirida yashovchi yoshu-qari tasviri inson foaoliyatining oqibatlari haqida o‘ylashga majbur qiladi. Xususan, krita va Infinite Painter asboblari yordamida yuqori sifatli raqamli san’atga xos aniqlik bilan ishlab chiqilgan predmetlar va ranglarning uyg‘unligi alohida e’tiborni tortadi. Aytish mumkinki, Avazjon Abdumajitovning raqamli texnologiyalar yordamida yaratilgan dijital art ishlarida rassomning yorqin va ta’sirli kompozitsiyalar yarata olish salohiyati namoyon bo‘lgan. Kartinalardagi ranglar nafaqat vizual element, balki his-tuyg‘ularni ifodalashning asosiy vositasi sifatida xizmat qilgan. Har bir ishda rassomning dijital art tamoyillarining asosiy unsurlari bo‘lgan kontrastlar, yorug‘lik o‘tishlari va effektlari, tasvir realligi va chuqurligi, tekstura va nur-soyalar orqali kompozitsiya ustida ishlay olish malakasi namoyon bo‘lgan.

Ko'chirib olish  ijodiy_ishlar_katalogi_abdumajitov_avazjon_shuhrat_ogli.pdf Hajmi: 4,75 Mb Ko'chirib olganlar: 7 Fayl nomi: ijodiy_ishlar_katalogi_abdumajitov_avazjon_shuhrat_ogli.pdf
Faylni online o'qish: ijodiy_ishlar_katalogi_abdumajitov_avazjon_shuhrat_ogli.pdf

---